ताथवडे घाटात दरड कोसळून अपघात; बारामतीच्या तरुणाचा जागीच मृत्यू
फलटण :
सातारा जिल्ह्यासह राज्यभर सुरू असलेल्या संततधार पावसाचा फटका आता घाटरस्त्यांनाही बसू लागला आहे. फलटण–पुसेगाव मार्गावरील ताथवडे घाटात रविवारी दरड कोसळून झालेल्या भीषण अपघातात बारामती येथील एका तरुणाचा जागीच मृत्यू झाला. या दुर्दैवी घटनेमुळे परिसरात हळहळ व्यक्त होत असून, घाटरस्त्यांच्या सुरक्षिततेचा प्रश्न पुन्हा ऐरणीवर आला आहे.
फलटण ग्रामीण पोलीस ठाण्यातून मिळालेल्या माहितीनुसार, योगेश पोपट जगताप (रा. बारामती) हे चारचाकी वाहनातून ताथवडे घाटातून प्रवास करत असताना अचानक डोंगरावरून मोठे दगड कोसळले. त्यापैकी एक मोठा दगड थेट वाहनाच्या बोनेटवर आदळल्याने चालकाचे वाहनावरील नियंत्रण सुटले आणि मोटार रस्त्यालगतच्या खांबावर जोरदार धडकली.
या भीषण अपघातात योगेश जगताप यांचा जागीच मृत्यू झाला. घटनेची माहिती मिळताच स्थानिक नागरिकांनी तातडीने घटनास्थळी धाव घेत मदतकार्य सुरू केले. त्यानंतर फलटण ग्रामीण पोलीस ठाण्याचे पोलीस निरीक्षक राजकुमार भुजबळ यांच्या मार्गदर्शनाखाली पोलिसांचे पथक घटनास्थळी दाखल झाले. वाहनात अडकलेल्या चालकाला बाहेर काढण्याचे प्रयत्न करण्यात आले; मात्र त्यापूर्वीच त्यांचा मृत्यू झाल्याचे स्पष्ट झाले.
सध्या सुरू असलेल्या मुसळधार पावसामुळे डोंगराळ भागात दरडी कोसळण्याच्या घटनांमध्ये वाढ झाली आहे. त्यामुळे ताथवडे घाटासह इतर घाटरस्त्यांवरून प्रवास करणाऱ्या वाहनचालकांनी विशेष दक्षता घ्यावी, तसेच अतिवृष्टीच्या काळात अनावश्यक प्रवास टाळावा, असे आवाहन प्रशासनाने केले आहे.
या घटनेचा पुढील तपास महिला पोलीस जाधव करत आहेत.