पावसाने दडी मारल्याने नीरा उजवा कालवा बंद; पाणीटंचाईची भीती
तरडगाव, जून महिन्याच्या सुरुवातीला झालेल्या मान्सूनपूर्व पावसामुळे शेतकऱ्यांमध्ये आशेचे वातावरण निर्माण झाले होते. पेरणीपूर्व मशागत पूर्ण करून शेतकरी पावसाच्या प्रतीक्षेत होते. मात्र जूनचा अर्धा महिना उलटूनही समाधानकारक पाऊस न झाल्याने शेतकरी वर्ग चिंतेत सापडला आहे. त्यातच **नीरा उजवा कालवा बंद झाल्याने** शेतीसह पिण्याच्या पाण्याच्या टंचाईची भीती व्यक्त केली जात आहे.
तरडगाव परिसरात उसाचे क्षेत्र मोठ्या प्रमाणावर असून या पिकाला भरपूर पाण्याची आवश्यकता असते. अनेक शेतकरी विहिरींच्या पाण्यावर अवलंबून असले तरी काही शेतकऱ्यांची संपूर्ण शेती कालव्याच्या पाण्यावर आधारित आहे. कालवा बंद असल्याने आणि पाऊस लांबल्याने ऊस व इतर पिके वाचविण्याचे मोठे आव्हान शेतकऱ्यांसमोर उभे ठाकले आहे.
परिसरातील काही विहिरींमध्ये अद्याप समाधानकारक पाणीसाठा असला तरी अनेक विहिरींची पाणीपातळी घटली आहे. दुसरीकडे जनावरांच्या चाऱ्याचे पीक अनेक शेतकऱ्यांनी यंदा घेतले नसल्याने चाऱ्याची टंचाई जाणवू लागली आहे. काही ठिकाणी शेतकरी जनावरांसाठी ऊस तोडून नेत असल्याचे चित्र दिसत आहे.
बंधारे आणि तलाव कोरडे
पावसाअभावी परिसरातील विविध गावांतील ओढ्यांवरील बंधारे पाण्याविना रिकामे पडले आहेत. तसेच अनेक तलाव कोरडे ठणठणीत झाल्याने परिस्थिती अधिक गंभीर बनली आहे. पिण्याच्या पाण्याच्या स्रोतांवरही याचा परिणाम होण्याची शक्यता व्यक्त केली जात आहे.
शेतकऱ्यांची चिंता वाढली
खते, बियाणे आणि शेतीसाठी लागणाऱ्या इतर साहित्यांच्या किमती वाढल्यामुळे उत्पादन खर्च आधीच वाढला आहे. त्यातच पावसाने ओढ दिल्यास आर्थिक संकट अधिक गडद होण्याची भीती शेतकरी व्यक्त करत आहेत.सध्या तरडगाव परिसरातील शेतकरी आकाशाकडे डोळे लावून बसले असून, लवकरात लवकर दमदार पाऊस झाल्यासच शेती आणि पाणीपुरवठ्यावरील संकट टळणार असल्याचे चित्र आहे.